اشعار حمید سخامهر

^{آواره او اوغلاندیکی جانانه سی یوخدور}

^{بيچاره ده اول قیزدیکي دیوانه سی یوخدور}

^{قیز ائوده گوزو یولدا قالیب ائلچینی گوزلور}

^{اوغلانداکی ائولنمه گه کاشانه سی یوخدور}

^{یاندیقجا توکور گوزیاشینی صبحه کیمی شمع}

^{دورونده طواف اتمه گه پروانه سی یوخدور}

^{اوغلان گوروسن قیرخا چاتیب سنّی سوبایدیر}

^{سن پوللي نشان وئرکی حرمخانه سی یوخدور}

^{شاعيرکی دئیر نعره مستانه چکن یوخ}

^{ویران اولا بو شهری کی میخانه سی یوخدور}

^{بیلمیر کی آدام کفله نیری ایچمه میش ایندی}

^{از بسکی اویوب نعرهء مستانه سی یوخدور}

^{ایله ایتیریبدیر اوزونو خلق تاپانمیر}

^{بنزیر پوزولان زولفولره شانه سی یوخدور}

^{آنجاق نه دییم عشقه ده حسرت قالیب انسان}

^{بیر قوش کیمی کی دنله مه گه دانه سی یوخدور}

^{آختارما سخا بوردا صفا ، چونکی بو شهرین}

^{مین مسجدی وار بیر دانا میخانه سی یوخدور}

  ^{«سخـــــــا»}

شهردار محترم بيزدن سلام اولسون سيزه

سيزکيمي انسانلاری چوخ گورمه سين الله بيزه

سن بيل الله سن باري گل چاره قيل بو تبريزه

داده ئيت بو ملّتي تنگه زارا گتدي سيچان

« الامان يا شهردار شهرداري الامان »

يول آزاندا چاي قيراقندان کئچنده هر زمان

مرحمت ائت کورپونون اوستونده بير لحظه دايان

گورنئجه چايدا سيچانلار ايليري نقل مکان

تئز يتيش امداده کي ميدان چايين گوتدو سيچان

« الامان يا شهردار شهرداري الامان »

چاي قيراقندا سيچانيله دولوبدور ائو ائشيک

فضله از بسکي ساليبلار ائولره ايلنميشيک

گيزله نيب ائوده سيچانين قورخوسونداندا پيشيک

گَل يتيش داده اطاقي مستراح ائتدي سيچان

« الامان يا شهردار شهرداري الامان »

بيلميريک هاردان تاپيبلار يول سيچانلار ائوميزه

گاه گيريللر مطباخا گاه صانديقا گاه دهليزه

ديرماشيللار صندله يا تختخوابه يا ميزه

داده ئيت کي چِينَه دي يورغانيدا ييتدي سيچان

« الامان يا شهردار شهرداري الامان »

ايسته سيز هرگون سيزي يوز يول دعا ائتسين «سخا»

امر ائدين مأمورلاريز تبريزه سپسينلر دوا

يوخسا طاعون گلسه بو شهره تاپيلماز چاره ها

تئز يئتيش امداده کي تَرپَشمه سن گئتدي سيچان

« الامان يا شهردار شهرداري الامان »

«سخــــــا»

يار کي بئله ماميلي ماتان گورسه نير

چوخــدو ياشي اؤزده جوان گورسه نير

بَللي دَگيل لَبلَرينه نيلـــه يير

يئکّـــــه آغيز غنچه دهان گورسه نير

آينا قاباغيندا دورور هر سحر

وَسمه ياخير قاشي کمان گورسه نير

سورمه چَکير گوزلره, کيرپيکلَري

اوخ ساياقي تؤکمَگَه قان گورسه نير

حسرَتيلَه باخما قارا زؤلفونَه

رنگ ووروب رِشتهء جان گورسه نير

ائتمه سه زينت اؤزونه اون قلم

اوندا گوررسن نه يامان گورسه نير

زؤلف آغاريب رنگ سؤلوب دوغروسو

جانه وئره ن جان,جان آلان گورسه نير

«سخــــــا»

ضدي دير انقلابين کيم دئييري ايش آزدير

اونو توتدور«اوين»نين زندانينا تئز آزدير

دگر انديش مگر راستا بازاردا گورمور

بازارين ان بويو ايپليکچيدي يا بزازدير

قاپوسوندا گجيلين مين جوره آل وئر واردير

بيري دلال بيري باققال بيري ساعت ساز دير

گئديسن بورک آلاسان بورکچو بازاردان سانکي

بورکو قويماقدا گوتورماقدا ساتان ممتازدير

دلله زنده يا درعباسيدادا معلوم دور

کهنه پالتارچيلارين هامموسو هوللوک بازدير

کچمک اولمور سس اليندن بازارين آغزيندان

آي کوپن آي کوپن آوازي طنين اندازدير

تا کوپن آل وئريده وار داها قالماز بيکار

سويوناندان سورا هر ديپلمه کي,سربازدير

دوزدوکي وارليدا يوخسولدا سيزيلدير با هم

بازارا کيم سوخولوب,آمما کئفي چوخ سازدير

ايلده برنامه سي يا خارجه دير يا کيش دير

بير بئله پول اله سالماق اوزو بير اعجازدير

سانکي طياره دوزلدن باباسيميش دايم

کهکشانلاردا اونون ايش پئشه سي پرواز دير

قالميشيق بيزده ياوان سنگکه حسرت بوردا

بسکي وردست بد اخلاقدي شاطر دانقازدير

هره بير جور چاپيري مملکتي آنجاقکي

يازيق آيليقچيلارين آيليقي چندرقازدير

سنده آز سوءيله سخا مملکت ايش سيزليکدير

ضدي دير انقلابين کيم دئييري ايش آزدير

«سخـــــــا»